El taller de llingua asturiana naz cola idea de crear un espaciu de deprendizaxe y perfeccionamientu de les habilidaes comunicatives en llingua asturiana, tanto nel planu d’espresión y comprensión oral como escrito.
L’actividá, que ta enfocada dende una perspectiva fundamentalmente práctica y de fomentu del coaprendizaxe, polo que va empobinada a toa persona interesada n’ampliar los sos conocimientos sobre llingua asturiana independientemente del so nivel.
Les sesiones tarán dividíes en dos partes. La primera tará dedicada a la espresión escrita, partiendo de les producciones de los alumnos pa correxir y repasar les normes ortográfiques y gramaticales amás d’ampliar los recursos sintácticos y de vocabulariu. La parte oral fadrá por quitar mieos a la d’intentar enfrentase n’asturianu a les situaciones comunicatives más diverses, corrixendo errores y buscando un modelu natural y prestosu de llingua falada.
Nel taller daráse atención, igualmente, a les producciones culturales actuales en llingua asturiana, asina como tolos elementos sociollingüísticos que condicionen el so desarrollu y evolución historicamente y n’actualidá.
Les sesiones tendrán llugar los martes de 17:30 a 20:00 nes instalaciones del Atenéu Obreru de Villaviciosa, a partir del 24 de xineru de 2017.
